صوبائی وزیر برائے ایکسائز مکیش کمار چاولہ کا کہنا ہے کہ ایکسائز پولیس چیک پوسٹس صرف مشکوک گاڑیوں کی چیکنگ کے لیے ہیں۔
مکیش کمار چاؤلہ نے اپنے ایک بیان میں ایکسائز پولیس افسران، ہلکاروں کو عام شاہراہوں اور ہائی ویز پر گاڑیوں کی غیر مجاز جانچ پڑتال کرنے سے سختی سے منع کرتے ہوئے کہا ہے کہ چیک پوسٹوں پر تعینات عملہ گاڑیوں کے کاغذات اور ٹیکس چیک کرنے کا مجاز نہیں ہے۔
مکیش کمار چاؤلہ نے کہا ہے کہ یہ غیرضروری عمل ہے اور اس کی فوری حوصلہ شکنی کی ضرورت ہے، گاڑیوں کے کاغذات کی ہراساں کرنے اور غیر مجاز / غیرضروری جانچ پڑتال کےسلسلےمیں متعدد شکایات موصول ہوئی ہیں جو ناقابل برداشت ہیں۔
انہوں نے مزید کہا ہے کہ ایکسائز پولیس کو کسی بھی جگہ ہر ایک گاڑی کی جانچ پڑتال کرنے کی اجازت نہیں ہے، سڑک کے وسط میں گاڑیاں روک کر ٹیکس ادا کرنے والی گاڑیوں کو روکنے کے مجاز نہیں ہیں۔
مکیش کمار چاؤلہ نے کہا ہے کہ گاڑیوں کو بلا جواز روکنے اور گاڑیوں سے سامان اتارنے کی کسی بھی قسم کی غیر قانونی سرگرمی کو ہر قیمت پر روکنا ہوگا، مستقبل میں ایسی کوئی شکایت موصول نہیں ہونی چاہیے بصورت دیگر وہ متعلقہ افسران کے خلاف سخت کارروائی کریں گے۔
