گزشتہ سال شوبز انڈسٹری سے کنارہ کشی اختیار کرنے والی رابی پیرزادہ نے انوکھے انداز میں تُرک صدر رجب طیب اردوان کو خراج تحسین پیش کیا ہے۔
شوبز انڈسٹری کو خیر باد کہہ کر اپنی زندگی اسلامی تعلیمات کے مطابق بسر کرنے والی رابی پیرزادہ نے مائیکرو بلاگنگ سائٹ ٹوئٹر پر اپنی دو تصویریں شیئر کی ہیں جن میں وہ تُرک صد رجب طیب اردوان کی پینٹنگ بناتی نظر آرہی ہیں۔
رابی پیرزادہ نے لکھا کہ ’اُنہوں نے ہمیشہ اُمت مسلمہ کو متحد رکھنے کے لیے کوششیں کی ہیں اور دُنیا بھر میں مسلمانوں پر ہونے والے ظلم کے خلاف آواز اُٹھائی ہے۔‘
ٓاُنہوں نے اپنے ٹوئٹ میں تُرک صدر کے لیے خواہش ظاہر کرتے ہوئے لکھا کہ ’میری خواہش ہے کہ میں یہ پینٹنگ رجب طیب اردوان کو تحفے میں دوں۔‘
واضح رہے کہ رابی پیرزادہ نے شوبز چھوڑنے کے بعد مصوری کو اپنا ذریعۂ معاش بنالیا ہے، اس کے علاوہ وہ فلاحی کاموں میں بھی بڑھ چڑھ کر حصہ لیتی نظر آتی ہیں۔
